БІЗДІҢ ЖАҢАЛЫҚТАР - 17.03.2020-ТАҒЫ ЖАҢАЛЫҚТАР

«Қазақстан Республикасы Энергетика министрлігі Атомдық және энергетикалық қадағалау мен бақылау комитетінің Шымкент қаласы бойынша аумақтық департаменті» Мемлекеттік Мекемесі 2020 жылдың 23 ақпанынан бастап «Қазақстан Республикасы Энергетика министрінің кейбір бұйрықтарына өзгерістер мен толықтырулар енгізу туралы» Қазақстан Республикасы Энергетика министрінің 2020 жылғы 6 ақпандағы № 43 бұйрығымен (бұдан әрі - Бұйрық) өзгерістер енгізілгенін хабарлайды.
Бұйрықта электроэнергетика саласындағы келесі нормативтік құқықтық актілерге өзгерістер мен толықтырулар енгізілді: "Электр энергиясын пайдалану қағидаларын бекіту туралы" Қазақстан Республикасы Энергетика министрінің 2015 жылғы 25 ақпандағы № 143 бұйрығына, "Электр энергиясының бөлшек сауда нарығын ұйымдастыру және оның жұмыс істеуі, сондай-ақ осы нарықта қызмет көрсету қағидаларын бекіту туралы" Қазақстан Республикасы Энергетика министрінің 2015 жылғы 20 ақпандағы № 111 бұйрығына және "Электрмен жабдықтаудың үлгілік шарттарын бекіту туралы" Қазақстан Республикасы Энергетика министрінің 2017 жылғы 23 қазандағы № 356 бұйрығына.
Бұйрық келесі өзгерістер мен толықтыруларды көздейді:
- тұтынушының электрмен жабдықтау шартына физикалық қол қою қажеттілігі алып тастау;
- тұтынушыға (жеке және заңды тұлғаларға) «бір терезе» қағидаты бойынша электрмен жабдықтау жүйесіне қосылу үшін құжаттарды тапсыру мүмкіндігі;
- электрмен жабдықтау жүйесіне қосылу үшін құжаттар санын қысқарту;
- энергиямен жабдықтаушы ұйымды ауыстыру кезіндегі жағдайды жақсарту;
-техникалық шартарды алу үшін мерзімдер мен құжаттарды қысқарту;
-тұтынушының энергия беруші ұйыммен жобалау құжатын келісілу нормасын алып тастау;
-тұтынушы мен энергиямен жабдықтаушы ұйым арасында төлем құжаттарын беру-алу қағаз құжат айналымын қысқарту;
-тұтынушының тұтыну шарттарын бұзған жағдайында қайта есептеу шарттарын жақсарту (қайта есептеу өшірусіз жүргізіледі).